كثير خير السجن دار فيا خصلة قراني
لوما حبس الحراش غادي نرخس فالسوم
هو الي ورالي حبابي مالي عدياني
جوزنا شي وقات كانت سابق مرسوم
والله ما كنت ضان في حبيب الخاطر ينساني
كنت أنضن ايلا غبت يبقى مني مهموم
الي ضنيت عليه صبتو يعشق فالفاني
غير انا مهبول والشي باين مفهوم
هذا ضني عليك يا الي حبك اعماني
رماني وسط بحور عامقا ما نعرفش انعوم
هذا وين شربت كاس هم الدنيا رواني
هذا وين بديت نعرف حق المظلوم
هذا وين طعنت فالمجالس وعرفت معاني
الذبانة ما تدخلش فالفم الي مزموم
بكري كنت صغير يا الفاهم طالع غيواني.
تارك الدنيا في حالها نشطح وسط القوم
ما عندي لا خي لا حبيب او لا من وصاني
بابا خلاني صغير يوم مات المرحوم
بكري كنت صغير يا الفاهم طالع غيواني
تارك الدنيا في حالها نشطح وسط القوم
يشكروني كثير ويقولو ذا زهواني
وانا نخسر فالمال غايس مسكين انهوم
كي كانت ليام كل الدنيا ترضاني
والي نأمر عليه فالحين يجي مخدوم
شحال كانوا عندي حباب واحد منهم ما جاني
والي كانو عديان بانو في ذاك اليوم
ما صبت حتى حد كل واحد منهم عداني
صبت الوالدين قايمين حضرولي فالشوم
كثير خير السجن دار فيا خصلة قراني
لوما حبس الحراش غادي نرخس فالسوم
هو الي ورالي حبابي مالي عدياني
جوزنا شي وقات كانت سابق مرسوم
تمت هذه القصيدة في 1973/03/07 بسجن الحراش
من كلمات محمد بلخياطي
ليست هناك تعليقات:
إرسال تعليق